Esil University кафедралары цифрландыру перспективаларын талқылады

«Қаржы» және «Есеп және аудит» кафедралары «Қаржы-банк секторын, бухгалтерлік есепті, аудитті және статистиканы цифрландыру: қиындықтар мен перспективалар» тақырыбында секция отырысын өткізді. Ол ҚР ҰҒА академигі, профессор Ғабдығапар Сейтқасымовтың 85 жылдығына арналған «Сейтқасымов оқулары – 2025» Халықаралық ғылыми-практикалық конференциясы аясында өтті.

ҚР Ұлттық Банкінің цифрлық трансформациясы және инфляцияны төмендету шаралары туралы баяндамалармен ҚР Ұлттық Банкінің өкілдері сөз сөйледі: Ищанова Руслана Қуанышқызы — ҚР Ұлттық Банкі Орталық филиалы директорының орынбасары, PhD докторы; Омарова Элнура Төлепбергенқызы — Қолма-қол ақша және кассалық операциялар бөлімінің бас маманы-экономисі; Пулатова Дана Нұрлышқызы — Экономикалық талдау және статистика бөлімінің бас маманы-экономисі.

ҚР Қаржы министрлігі Мемлекеттік кірістер комитетінің оқу-әдістемелік орталығының заңгері және салықтық кеңесшісі Қалиев Жүнісбек Артурович Қазақстан Республикасындағы ең аз жаһандық салықтың ерекшеліктері туралы баяндады.

Спикер ретінде Л.Н. Гумилев атындағы ЕҰУ «Қаржы» кафедрасының э.ғ.д., профессоры Исқақова Загира Дүйсенбайқызы «Қазақстанның қаржы секторында цифрландыру құралдарын қауіпсіз пайдаланудың маңызды факторлары туралы» тақырыбында сөз сөйледі.

Іс-шара аясында баяндамаларды талқылау болды, қаржы-банк секторын цифрландыру, бухгалтерлік есеп, аудит және статистика мәселелері бойынша ұсынымдар берілді.