Esil University делегациясының сапар бағдарламасы екі зерттеу жобасы бойынша ғылыми жұмысқа толығымен арналды. Күннің бірінші жартысы AP26104777 ЖТН «Квазимемлекеттік секторды реформалаудың жүйелік әсерлері: Қазақстандағы мемлекеттік басқарудың жаңа моделіне қарай» жобасы аясында өтті.
Күн мемлекеттік басқару, экономика және бизнес, инженерия және цифрлық технологиялар факультеттерінің деканодарымен жұмыс сессиясынан басталды. Факультет басшылары өздерінің білім беру бағдарламаларын, қолданыстағы зерттеу бағыттарын және университет ғылымын дамытудың стратегиялық тәсілдерін таныстырды. Талқылау барысында ғылыми ынтымақтастықтың кең мүмкіндіктері анықталды — бірінші кезекте мемлекеттік секторды реформалау, басқаруды цифрлық трансформациялау, квазимемлекеттік институттардың тиімділігін арттыру және есептілік жүйелерін жетілдіру салаларында.
Одан кейін «Квазимемлекеттік сектор: халықаралық модельдер және құрылымдық өзгерістер» тақырыбындағы тематикалық семинар өтті. Индонезиялық ғалымдар мемлекеттік компаниялар мен холдингтерді реттеу тәжірибесін ұсынып, мемлекеттік құрылымдарда аудит, есептілік және цифрлық құралдарды енгізу механизмдерін талқылады. Esil University қызметкерлері өз кезегінде Қазақстанның квазимемлекеттік секторын реформалау бойынша алдын ала аналитикалық ұстанымдарды ұсынып, халықаралық салыстырулар мен практика алмасудың маңыздылығын атап өтті.
Күннің екінші жартысы «Жасанды интеллекттің еңбек нарығына әсері: цифрлық трансформация жағдайындағы жастарға арналған мүмкіндіктер мен қиындықтарды талдау» AP26105089 жобасы бойынша жұмысқа арналды.
Esil University делегациясы жасанды интеллектің жас мамандардың жұмысбастылығына ықпалының негізгі аспектілерін қарастырған мазмұнды презентация ұсынды. Автоматтандырумен, дәстүрлі мамандықтардың жойылуымен, жаңа мансаптық траекторияларды қалыптастырумен және цифрлық құзыреттерді дамыту қажеттілігімен байланысты жаһандық сын-қатерлерге ерекше назар аударылды.
Күннің соңы «Жасанды интеллект және жұмыспен қамтудың болашағы: жаһандық трендтер және аймақтық контекст» ғылыми семинарымен аяқталды. Азия мен Орталық Азияның еңбек нарықтарының трансформациясының негізгі аспектілері, Қазақстан мен Индонезияның алғашқы салыстырмалы бақылаулары, сондай-ақ болашақтағы бірлескен зерттеу үшін ортақ нүктелер талқыланды.
