Бюджет саясатының басымдықтары мен ұлттық экономиканың тұрақтылығы талқыланды

«Қаржы» кафедрасының профессорлық-оқытушылық құрамы танымал ғалым-экономист және қоғам қайраткері, экономика ғылымдарының докторы, профессор Берік Тұрсынбекұлы Бейсеңғалиевтің 60 жылдық мерейтойына арналған «Қазақстанның экономикалық саясаты және тұрақты дамуы: ғылым, заң шығармашылығы және практика» атты Халықаралық ғылыми-практикалық конференция шеңберінде «Қаржы жүйесі, бюджеттік саясат және ұлттық экономиканың тұрақтылығы» тақырыбындағы секция отырысын ұйымдастырды.

Секция отырысы шеңберінде қаржы жүйесінің жұмыс істеуінің негізгі аспектілері, бюджет саясатының басым бағыттары, жаһандық қиындықтар мен құрылымдық өзгерістер жағдайында ұлттық экономиканың тұрақтылығын арттыру механизмдері қаралды. Қатысушылар мемлекеттік борышты басқару, салықтық-бюджеттік реттеу, қаржы секторын цифрландыру, сондай-ақ әлеуметтік-экономикалық дамуды қамтамасыз етудегі мемлекеттік қаржының рөліне ерекше назар аударды.

«Қаржы» кафедрасының оқытушылары, «Қаржы» ОБ докторанттары мен магистранттары баяндамалармен сөйледі, қаржы ғылымының өзекті бағыттары бойынша ғылыми зерттеу нәтижелері мен аналитикалық материалдарды ұсынды. Талқылау барысында бюджеттік шығыстардың тиімділігін арттыру, қаржылық тәртіпті нығайту және экономикалық өсудің тұрақты көздерін қалыптастыру мәселелері көтерілді.

Отырыс конструктивті және ғылыми-практикалық атмосферада өтіп, пікір алмасуға және Қазақстан Республикасының қаржы саясатын жетілдіру бойынша ұсынымдар әзірлеуге ықпал етті.